Üçqulaq paxlava

Azərbaycanda paxlavanın müxtəlif növləri var - Bakı, Şəki, Gəncə, riştə… Adətən, paxlavanı romb kimi kəsirlər. Qəbələ paxlavasını isə kəsmək lazım deyil, bir-iki dişləmə bitir. Üçbucaq formasında hazırlandığından elə adına da "üçqulaq" deyirlər.

Tərkibi: 
xəmir: 
un 
duz
su
 
iç: 
qoz 
şəkər tozu

qızartmaq üçün: 
ərinmiş kərə yağı 


Qozu maşından keçirin, şəkər tozu qatın. 

Un, duz, sudan adi xəmir yoğurun. Qəzet kimi napnazik yayın. Alınmırsa, hazır filo xəmirindən istifadə edin (qat-qat xəmir yox a!). 

Xəmiri şəridlərə bölün. Üzərinə plyonka çəkin, yoxsa quruyar, bükə bilməzsiniz.

Bir şəridi götürüb bir qırağını üçbucaq formasında qatlayın.

İç qoyub xəmirin qırağını sıxın.

Sonra şəridin qalanını bunun ətrafında elə qatlayın ki, üçbucağın hər tərəfində ən azı üç qat xəmir olsun. Bundan sonra şəriddən artıq qalırsa, bıçaqla kəsin. 

Barmağınızı isladıb şəridin açıq qalan tərəfini "üçbucağa" yapışdırın. 

Bu qayda ilə xəmirdən üçqulaqlar hazırlayın. Bunu bişirməmiş də paketə qoyub soyuducuda  bir neçə gün saxlaya bilərsiniz. Qonaq gəldi - tezcə hazırlayıb isti-isti süfrəyə vermək olar.

Ərinmiş kərə yağında üçqulaqları qızardıb süfrəyə verirlər. Onun dadı elə isti olanda çox qəşəngdir

 

 

Nuş olsun! 

Milli.Az

Ardını oxu...

Soçi paxlavası

Tərkibi: 
xəmir:
3 st. un 
200 q otaq temperaturunda yağ 
200 q xama
3 yumurtanın sarısı
0,5 ç.q. soda
1/4 ç.q. duz

iç: 
2 st. qoz (500 q)
darçın 
5-6 ədəd hil 
3 ədəd mixək 
4 yumurtanın ağı 
1 çimdik duz
300 q şəkər tozu
vanil

üzərinə:
1 yumurta


Yumurtaların ağını sarısından ayırın. 

Xamaya soda və duz qatıb qarışdırın. Həcmi artacaq. 

Kərə yağını sürtgəcdən keçirib unla ovun. Yumurta sarılarını əlavə edib yenə ovun, sodalı xamanı əlavə edib xəmir yoğurun. 

Xəmiri 3 yerə bölün, kündələyin. Bir qaba qoyub ağzını örtün, soyuducuda 30-40 dəqiqə saxlayın. 

İç: 

Qozu ət maşınından keçirin, 150 q şəkər tozu əlavə edib qarışdırın. 

Darçın, hil və mixəyi qəhvəüyüdəndə üyüdün, ələyib qoza əlavə edin. 

Yumurta ağına 1 çimdik duz və 150 q şəkər tozu əlavə edib çəngəllə çalın. Sonra qozlu qarışığı buraya əlavə edib yaxşıca qarışdırın, iki yerə bölün. 

30x20 sm ölçülü teflon örtüklü metal formaya perqament döşəyin.

Soyuducudan kündələrin birini çıxarın. Yastılayıb urfasız (un vurmadan), formanın ölçüsündə yayın. Sonra zərf kimi qatlayın və formanın içinə qoyun.

Hamarlayın, için yarısını üstünə bərabər qaydada yayın. 
Soyuducudan ikinci kündəni çıxarın, əməliyyatı təkrarlayın (yayın, formadakı için üstünə qoyun, için qalanını üstünə döşəyib yayın). Üçüncü kündəni yayıb sonuncu layın üstünə çəkin. Formanın üzərinə dəsmal çəkib soyuducuda yarım saat saxlayın.

Sobanı 200 dərəcə C qızdırın. 

Paxlavanı soyuducudan çıxarın, tərəfi 5 sm olan kvadratlara bölün, üzərinə yumurta sarısı çəkin, sobada 15 dəqiqə bişirin. Sonra dərəcəni 180-ə endirib daha 30 dəqiqə bişirin.  

Paxlavanı sobadan çıxarıb soyudun.  

Böyütmək üçün şəkillərə klikləyin.




Kişmişli Soçi piroqu 
Tərkibi (iki sini üçün): 

xəmir: 
3 st. un 
300 q kərə yağı
300 q xama

iç: 
6 yumurtanın ağı 
2 st. şəkər tozu
300 q qoz 
1 st. kişmiş 

üzərinə: 
1 yumurtanın sarısı
fındıq 

30 sm diametrli forma

  
Qozu ət maşınından keçirin, kişmişi yuyub qurudun. 

Xəmir: unu ələyin, kərə yağını üstünə qoyub bıçaqla xırdalayın. 

Sonra bu ovuntuğu ləyənə qoyun, xama əlavə edib yoğurun, kündələyin. Soyuducuya qoyun. 

İç: 

Yumurta ağlarını tədricən şəkər tozu əlavə edərək çalın. Qozu və kişmişi əlavə edib qarışdırın. 

Bir sini üçün 3 kündə götürün. Formanın ölçüsü boyda yayın, birinci və ikinci layların üstünə iç qoyun, üçüncü lay xəmirlə piroqun üstünü örtün. 

Kənarlarını barmaqlarınızla basdırın. Ya paxlava, ya da dördbucaq formasında kəsin. Üzərinə yumurta sarısı çəkin, fındıq basın. 

180 dərəcə qızdırılmış sobada 30-35 dəqiqə bişirin. 

(1 sini paxlava bişirmək istəyirsinizsə, ərzağı ikiyə bölün). 

Böyütmək üçün şəkillərə klikləyin.



Nuş olsun! 

Milli.Az

Ardını oxu...

Gəncə paxlavası

Tərkibi (iri məcməyi üçün): 

xəmir: 

1 kq un 
5 yumurta
100 q ərinmiş yağ
50 q gül suyu
azca su 

iç: 
qoz 
şəkər tozu
hil 

arasına: 

1 kq kərə yağı

şərbət: 
1 l su
1 kq şəkər tozu

üzərinə:
zəfəran
qoz
xaş-xaş 


Təmizlənmiş qozu maşından keçirib şəkər tozu və hillə qarışdırın. 



Xəmir üçün olan ərzaqları qarışdırıb xəmir yoğurun. Üzərinə nəm dəsmal çəkib təxminən yarım saat saxlayın. 



Xəmiri 9 yerə bölüb kündələyin, birini daha iri tutun (altı üçün). İri kündəni məcməyidən bir qədər iri böyüklükdə nazik yayın. Paxlava xəmiri istidə yayılanda cırılır, odur ki, soyuq otaqda yayın. 

Məcməyini yağlayın. Yaydığınız lavaşı içinə döşəyin, kənarları azca sallansın. 

Üzərinə iç qoyub bərabər yayın. 

Digər kündələri məcməyi boyda yayıb, prosesi təkrarlayın. Son lavaşı paxlavanın üzərinə çəkib, kənarlardan sallanan birinci lavaşın qırağını qatlayıb altına salın. 

Sonra paxlavanı doğrayın. Əvvəlcə nişanlayın, sonra doğrayın. Çalışın ki, altdakı xəmirlə qoz yuxarı çıxmasın. Bunun üçün iti bıçağı arada suya batırın (əla bir üsul da var - bıçağı odda qızdırıb paxlavanı kəsmək). 



10 q zəfəranı həvəngdəstədə döyün, çay kimi dəmləyin. Sonra şotka ilə ehtiyatla paxlavanın üzərinə çəkin. 

Ağ xaş-xaş yoxdursa, qara xaş-xaşın üstünə qaynar su tökün, sonra dəsmalın arasında qurudun. Sonra paxlava romblarının aşağı və yuxarı hissələrinə azacıq səpin. Ortalarına qoz, yaxud badam basın. 



Gəncə paxlavası ocaqda bişir. Ocağı qalayıb köz salanda kənarlarına 4 qırmızı kərpic düzüb məcməyini üstünə qoyun. Amma əvvəlcədən ortadakı közü azacıq dağıdın, yaxud kənara çəkin ki, ortası yanmasın.  



Bir müddət sonra paxlavanın ətri yayılır, deməli, üzərinə ərinmiş yağ gəzdirmək lazımdır ki, layları yaxşıca qızarıb bişsin. Bıçaqla kənarından qaldırıb paxlavanın rəngini yoxlayın. 



Altı bişməyə yaxındırsa, üstünü də bişirmək lazımdır. Məcməyinin kənarına 4 şiş düzün, üzərinə də başqa məcməyini çevirin (şiş ona görə düzülür ki, üstdəki məcməyi paxlavanı əzməsin). Altdakı közdən götürüb üstdəki məcməyinin üstünə tökün (altda da bir az qalsın).  



Bişəndən sonra təxminən 2 l qaynar şərbəti paxlavanın üzərinə gəzdirin. Soyuyandan sonra bir də doğrayın. 




Bişirdi Turaz xanım. Əllərinə sağlıq! 
Bu resept ocaqda paxlava bişirməyə şəraiti olanlar üçündür. Kimdə belə şərait yoxdursa, kefini pozmasın. Sobada da bişirmək olar, özü də fərqli paxlavalar: badamla, qozla, yaşıl fıstıqla, hətta qarışıq. 



Tərkibi:

xəmir: 
1 kq un 
100-150 q un 
2 yumurta
180 q ərinmiş yağ
50 q hazır şərbət 
100 ml gül suyu

iç: 
1,5 kq badam
500 q şəkər pudrası
10 ədəd hil 

arasına:
700-1000 q kərə yağı 

şərbət: 
1000 q şəkər tozu
500 ml su (bunun bir hissəsini gül suyu ilə əvəz edə bilərsiniz)
1 limonun şirəsi 

Hamısını qarışdırıb yoğurun, qida plyonkasına bükün. Yarım saat saxlayın.  

Təmizlənmiş badamı sobada azca qovurun, qoz maşınından keçirin. Şəkər pudrası əlavə edin. Hilin qabıqlarını təmizləyin, dənələrini həvəngdəstədə 1 ç.q. şəkər tozu ilə döyün. Sonra qozla şəkər pudrasına qarışdırın.

İstəyən badamın 500 q-nı yaşıl italyan fıstığı ilə əvəzləyə bilər. Onu da sobada 130-140 dərəcədə bir az qovurmaq lazımdır (gözləyin, yanmasın).

Şərbət: 1 kq şəkər tozuna 500 ml su götürün, bunun da bir hissəsini gül suyu ilə əvəzləyə bilərsiniz, 1 limonun şirəsini əlavə edin, ocağın üstünə qoyun. Qaynara düşəndən sonra ocağı azaldın, 10 dəqiqə bişirin. Rəngi şəffaf olur. Bundan sonra ocağı bir qədər artırıb şərbət bal rəngi alanadək bişirin. 

(Suyun bir hissəsini təzə, süzülmüş portağal şirəsi ilə də əvəz etmək olar, o da dadlıdır). 

Üzərinə çəkmək üçün 50 ml zəfəran dəmləməsi ilə 1 yumurtanın sarısını qarışdırın. 

Hazırlanma qaydası eynidir: xəmirdən kündə tutub nazik yayın, yağlanmış siniyə döşəyin, üzərinə iç səpib bərabər yayın. Digər kündələri də yayın, eyni qayda ilə üst-üstə döşəyin. Paxlavanı doğrayın. Üzərinə zəfəranlı yumurta qarışığı çəkin. 160-170 dərəcə qızdırılmış sobada bişirin. 

Arada ərinmiş yağ tökün. Bişəndən sonra isə qaynar şərbəti üzərinə gəzdirin.



Nuş olsun! 

Milli.Az 

Ardını oxu...